Azərbaycan Respublikasının mədəniyyət nazirinin müavini Murad Hüseynovla İstanbul Kültür Sanat Vəqfinin İdarə Heyətinin sədri Bülent Eczacıbaşı arasında görüş keçirilib.
Görüşdə Azərbaycan Respublikasının Türkiyədəki Səfirliyinin nəzdindəki Azərbaycan Mədəniyyət Mərkəzinin direktoru Samir Abbasov da iştirak edib.
Görüş zamanı Türkiyə ilə Azərbaycan arasında köklü qardaşlıq münasibətlərinin və güclü mədəni əlaqələrin daha da inkişaf etdirilməsinə dair məsələlər müzakirə olunub. Bu çərçivədə ortaq mədəniyyət və incəsənət layihələri, film festivalları, klassik musiqi, caz, teatr və filarmoniya sahələrində həyata keçirilə biləcək əməkdaşlıq imkanları, təcrübə mübadiləsi, eləcə də gələcəyə yönəlik layihələr ətraflı şəkildə dəyərləndirilib.
