Azərbaycan Respublikasının Türkiyədəki Səfirliyinin nəzdindəki Azərbaycan Mədəniyyət Mərkəzinin direktoru Samir Abbasov Türkiyə Respublikasının Mədəniyyət və Turizm Nazirliyinin Gözəl Sənətlər Baş İdarəsinin müdiri Ömer Faruk Belviranlı ilə görüşüb.
Gözəl Sənətlər Baş İdarəsində keçirilən görüşdə iki qardaş ölkə arasında xüsusilə musiqi, rəssamlıq, heykəltəraşlıq və mərmər sənəti sahələrində birgə layihələrin həyata keçirilməsi və ortaq mədəni dəyərlərin daha geniş auditoriyaya tanıdılması məsələləri müzakirə olunub.
Görüş zamanı iki ölkənin sənətçiləri arasında təcrübə mübadiləsinin aparılması, sənət düşərgələrinin təşkili, sərgilərin açılması, miniatür, təzhib və dekorativ-tətbiqi sənət sahələrində ustad dərslərinin keçirilməsi, dünya şöhrətli azərbaycanlı bəstəkarların opera əsərlərinin türk orkestrlərinə hədiyyə edilməsi və həmin əsərlərin Türkiyədə fəaliyyət göstərən simfonik orkestrlərin repertuarına daxil edilməsi məsələləri müzakirə edilib.
Bundan əlavə, Azərbaycan və Türk dünyasının böyük bəstəkarı Üzeyir Hacıbəylinin “Leyli və Məcnun” operası əsasında iki ölkənin sənətçilərinin iştirakı ilə birgə konsert proqramının hazırlanması məsələsi də gündəmə gətirilib və bu istiqamətdə əməkdaşlıq barədə razılıq əldə olunub.
