Azərbaycan Respublikasının Türkiyə Respublikasındakı Səfirliyinin nəzdində fəaliyyət göstərən Azərbaycan Mədəniyyət Mərkəzinin direktoru Samir Abbasov, Türkiyənin mədəniyyət və turizm baxımından ən mühüm şəhərlərindən biri olan Erzurumda İl Mədəniyyət və Turizm Müdiri Ahmet Yeri ilə görüş keçirmişdir.
Səmimi şəraitdə baş tutan görüşdə Azərbaycan və Türkiyə arasında qədim köklərə söykənən qardaşlıq münasibətlərinin mədəniyyət sahəsində daha da inkişaf etdirilməsinin vacibliyi vurğulanmışdır. Tərəflər, xüsusilə milli mədəniyyətimizin və ortaq dəyərlərimizin Türkiyədə daha geniş şəkildə tanıdılması üçün müxtəlif istiqamətlərdə əməkdaşlığın qurulmasının əhəmiyyətini qeyd etmişlər.
Müzakirələr zamanı gələcəkdə həyata keçirilə biləcək ortaq layihələr, mədəniyyət həftələri, sərgilər, konsertlər, teatr tamaşaları və ədəbi-bədii tədbirlərin təşkili barədə fikir mübadiləsi aparılmışdır. Həmçinin iki ölkə arasında kitabxana və muzeylər səviyyəsində əlaqələrin gücləndirilməsi, mədəni irs nümunələrinin qarşılıqlı təqdimatı, gənc istedadların dəstəklənməsi və incəsənət sahəsində yeni təşəbbüslərin reallaşdırılması məsələləri də diqqət mərkəzində olmuşdur.
Görüş zamanı qeyd olunmuşdur ki, Azərbaycan və Türkiyə xalqlarının tarixi, mədəni və mənəvi yaxınlığı bu əməkdaşlıq üçün möhkəm zəmin yaradır. Bu səbəbdən, tərəflər mədəniyyət və turizm sahəsində əməkdaşlığın davamlı olmasının, ortaq layihələrin reallaşdırılmasının və iki qardaş ölkə arasında əlaqələrin daha da dərinləşdirilməsinin vacibliyini vurğulamışlar.
Görüşün sonunda hər iki tərəf qarşılıqlı faydalı əməkdaşlığın inkişafı üçün razılıq ifadə edərək, gələcək layihələrdə sıx əməkdaşlıq etməyə hazır olduqlarını bəyan etmişlər.
