Azərbaycan Respublikasının Türkiyədəki Səfirliyi Xarici İşlər Nazirliyinin Əməkdaşlarının Həyat Yoldaşları Həmrəylik Dərnəyi (DMEDD) tərəfindən təşkil olunan ənənəvi xeyriyyə yarmarkasında iştirak edib.
Tədbir çərçivəsində səfirliyimizin nəzdindəki Azərbaycan Mədəniyyət Mərkəzi tərəfindən ölkəmizin zəngin mədəni irsi, milli mətbəxi və yerli məhsulları təqdim olunub. Azərbaycan mətbəxinə aid ənənəvi təamlar, əl işləri və milli mədəni məhsullar tədbir iştirakçıları tərəfindən böyük maraqla qarşılanıb.
Mədəni proqram çərçivəsində Azərbaycan Mədəniyyət Mərkəzinin Zəngəzur Rəqs Ansamblı milli rəqslərimizi nümayiş etdirib.
Yarmarka çərçivəsində toplanan ianələrin təqaüdlərə və sosial yardım layihələrinin həyata keçirilməsinə yönəldiləcəyi bildirilib.
Aksiya diplomatik nümayəndəliklər arasında həmrəyliyin möhkəmləndirilməsi və xeyriyyəçilik dəyərlərinin təşviqi baxımından mühüm əhəmiyyət kəsb edib.
